Ný listahátíð fyrir unga fólkið

Jónsvaka er ný listahátíð sem verður haldin í fyrsta sinn dagana 24.-27. júní og er markmið hennar að efla þátttöku ungra listamanna í listalífinu. Hátíðin dregur nafn sitt af Jónsmessunótt en dagurinn fyrir Jónsmessu og sjálf Jónsmessunóttin voru nefnd Jónsvaka hér árum áður.

Hildur Maral Hamíðsdóttir, stjórnandi hátíðarinnar, segir að sér hafi þótt vanta vettvang þar sem ungt listafólk gæti sýnt verk sín og þar hafi hugmyndin að Jónsvöku kviknað. „Það er mikill fjöldi listahátíða sem einblína á eitt fag, líkt og kvikmyndahátíðir, myndlistarhátíðir og tónlistahátíðir, en mér fannst vanta listahátíð sem sameinar öll þessi listform undir einum hatti," útskýrir Hildur.

Hún segist hafa gott fólk með sér þegar kemur að skipulagningu hátíðarinnar og nefnir í því samhengi Faxaflóa, sem sá meðal annars um skipulagningu tónlistarhátíðarinnar Rétta, Patron og Framkvæmdafélag listamanna. Hátíðin er styrkt af Evrópu unga fólksins og því sé miðað við að umsækjendur séu ungir að árum og að stíga sín fyrstu skref innan listaheimsins.

Hildur segir að ýmis gallerí í miðborginni verði viðloðin Jónsvöku, en einnig verði gjörningar á götum úti auk tónleikahalds. „Þetta fer mjög mikið eftir því hverjir sækja um og hvar þeir vilja sýna verk sín. En planið er að hátíðin verði bæði lifandi og sýnileg borgarbúum." Hún segir nokkurn fjölda hafa sótt um þátttöku nú þegar en grunar að enn eigi eftir að bætast í þann hóp, en umsóknarfrestur stendur til 4. apríl næstkomandi. „Mig grunar að það verði sprengja daginn sem lokað verður fyrir umsóknir, það vill oft verða þannig."

Hægt er að sækja um þátttöku á vefnum www.jonsvaka.is. - sm