Bæjarfulltrúar sýknaðir: „Óþægilegt að hafa þetta hangandi yfir sér“

„Ég var ekki mjög kvíðinn yfir þessu, en það er óþægilegt að hafa svona lagað hangandi yfir sér," segir Guðríður Arnardóttir, bæjarfulltrúi Samfylkingarinnar í Kópavogi. Hún, Ólafur Þór Gunnarsson og Hafsteinn Karlsson voru sýknuð í morgun í meiðyrðamáli sem Frjáls miðlun höfðaði í Héraðsdómi Reykjaness.

Það fyrirtæki varð umdeilt á síðasta ári og var harkalega deilt á það af hálfu bæjarfulltrúanna en í ljós kom að Kópavogsbær gerði umsvifamikla verksamninga við fyrirtækið. Þá var Gunnar I. Birgisson bæjarstjóri en eigandi Frjálsrar miðlunar er dóttir hans og tengdasonur.

„Það var tekið fram í dómnum að ummælin væru hluti af starfsskyldum okkar enda beindust þau að stjórnsýslunni í Kópavogi," segir Guðríður sem er að vonum sátt við sigurinn.

Alls krafðist dóttir og tengdasonur Gunnars 11,4 milljóna króna vegna ummælanna. Þess í stað er þeim gert að greiða málskostnað bæjarfulltrúanna sem samanlagt nemur tæpri milljón.