Spaugstofuhringnum lokað

Spaugstofan er komin yfir á Stöð 2 eftir tvo farsæla áratugi í Sjónvarpinu. Þátturinn verður með óbreyttu sniði og á sama tíma og áður, eða á laugardagskvöldum kl. 19.35.

Meðlimir Spaugstofunnar undirrituðu tveggja ára samning við Stöð 2 í Þjóðmenningarhúsinu í gær um að ástsælasti sjónvarpsþáttur þjóðarinnar undanfarin tuttugu ár yrði þar á dagskrá frá og með 9. október.

Spaugstofan verður áfram á sínum gamalgróna sýningartíma, á laugardögum kl. 19.35, og keppir því við nýjan skemmtiþátt Góa sem verður á sama tíma í Sjónvarpinu. „Þetta er eins og þeir segja í fótboltanum, það er enn þá mikill karakter í liðinu og við teljum okkur eiga mikið inni. Leiktíðinni hjá okkur er bara alls ekkert lokið," segir Sigurður Sigurjónsson.

Vangaveltur höfðu verið uppi um hvort og þá hvar Spaugstofan yrði á dagskrá í vetur eftir að Sjónvarpið ákvað að nýta sér ekki krafta hennar lengur. Skjár einn var helst nefndur til sögunnar en ekkert varð úr þeim viðræðum. „Þeirra hugmyndir voru um einfaldari gerð af þætti en við sáum okkar hag bestan í að halda honum óbreyttum með því sniði sem hann var og verður áfram," segir Örn Árnason.

Kollegi hans, Pálmi Gestsson, bætir við að margir hafi rætt við þá eftir að þeir hættu hjá Sjónvarpinu. „Það var vítamínsprauta að átta sig á því að þegar við gengum út úr RÚV þá var töluverð ásókn í okkur," segir hann. „Það voru aðrir sem vildu gera bíó og alls konar hugmyndir voru í gangi sem fóru ekki lengra," segir hann og útilokar ekki að í framtíðinni verði einmitt gerð bíómynd með Spaugstofunni og hugsanlega verði þættirnir einnig gefnir út á mynddiskum. Pálmi segir þá félaga eldhressa og móralinn framúrskarandi góðan sem fyrr. „Það eru til miklu betri grínistar og betri höfundar og leikarar en við en það er hópurinn sem er galdurinn."

Randveri Þorlákssyni var á sínum tíma sagt upp hjá Spaugstofunni vegna niðurskurðar og þótti mörgum það miður. Spurður segir Pálmi það ekki á döfinni að taka hann aftur inn í hópinn nú þegar þátturinn er kominn yfir á Stöð 2. „Það hefur einhvern veginn ekki komið upp á borðið. Er ekki svo lítið eftir af peningum í þessu þjóðfélagi að það er betra að hafa færri en fleiri fyrir okkur?"

Ari Edwald, forstjóri 365, fagnar komu Spaugstofunnar til Stöðvar 2. Hann segist lengi hafa haft áhuga á að fá þáttinn yfir til sín. „Það hefur ekki verið raunhæft fyrr en þessi skrítna staða kom upp að RÚV gaf þá frá sér. Ég reyndar skil ekki þá ákvörðun en ég segi að sjálfsögðu „takk"," segir Ari. „Það sem skapar tekjurnar í þessari starfsemi er að hafa efni sem fólk vill horfa á. Ég hef engar áhyggjur af því að Spaugstofan muni ekki standa undir sér fjárhagslega."

Framleiðsla Spaugstofunnar mun fara fram á vegum Sagafilm í gamla sjónvarpshúsinu við Laugaveg 176 þar sem þættirnir voru einmitt framleiddir fyrstu árin sem þeir voru sýndir. Að vissu leyti má því segja að Spaugstofuhringnum hafi verið lokað.

freyr@frettabladid.is