Búast við að breska flugstjórnarsvæðinu verði lokað

Búist er við því að flugstjórnarsvæðinu yfir Bretlandi verði lokað frá og með morgundeginum til þriðjudags vegna öskufalls. Þetta hefur Daily Telegraph eftir breska samgönguráðuneytinu.

Í frétt á vef blaðsins kemur fram að helstu flugvöllum í suðausturhluta Englands verði sennilegast lokað. Þá er búist við því að flugvöllum í Skotlandi og á Írlandi verði lokað.

Breska ríkisstjórnin hefur samþykkt að fimm daga öskuspá verði gerðar opinberar á vef bresku Veðurstofunnar. Hingað til hafa bara verið gefnar út 18 klukkustunda spár.