Beitti sambýliskonu sína ítrekað ofbeldi

Héraðsdómur Reykjavíkur dæmdi í fyrradag ungan karlmann í sex mánaða fangelsi fyrir itrekað ofbeldi gagnvart þáverandi sambýliskonu sinni.

Maðurinn var dæmdur fyrir að hafa fjórum sinnum á tímabilinu desember 2007 - maí 2008 ráðist á konuna á heimili þeirra í Breiðholti. Í eitt skipti beit hann konuna í kinnina, en í hin skiptin beitti hann hana margvíslegu öðru líkamlegu ofbeldi.

Maðurinn hafði áður verið dæmdur í sex mánaða skilorðsbundið fangelsi fyrir ofbeldi gagnvart unnustu sinni. Hann var því að rjúfa skilorð þegar að hann braut gegn sambýliskonu sinni.