Tók tónlistarmyndband upp á síma

„Ég þurfti bara að hlaða símann einu sinni í þennan eina og hálfa dag sem tökurnar stóðu yfir," segir Isak Winther grafískur hönnuður sem tók upp myndband við lagið Þriggja daga vakt en það sem þykir óvanalegt við myndabandið er að það var allt tekið upp gegnum myndavél á síma.

„Ég er ánægður með útkomuna en við vildum búa til ákveðna stemmingu í kringum lagið. Gera þetta svona aðgengilegra fyrir fólk með því að nota þessa tækni. Sýna fólki að það er ekkert mál enda flestir símar komnir með flotta tækni sem hægt er að leika sér með," segir Ísak og bætir við að myndbandið hafi alltaf átt að vera ódýrt í framleiðslu. „Við vildum ekki gera myndaband í háskerpu með óhreyfðum römmum heldur var það þetta símamyndabandútlit sem við vorum að sækjast eftir. Gera eitthvað sem allir geta gert sjálfir í sínum símum."

Eins og Fréttablaðið greindi frá fyrir stuttu er lagið Þriggja daga vakt samstarf hljómsveitanna NýDönsk, Gus Gus og Hjaltalín en sveitirnar munu koma fram á Akureyri um verslunarmannahelgina á hátíð sem gengur undir sama nafni.

„Við vorum alveg svakalega heppin að fá Daníel Ágúst Haraldsson með okkur í lið en hann leikur aðalhlutverkið í myndabandinu ásamt nokkrum statistum, en hann er náttúrulega öllu vanur," segir Ísak en þetta er í fyrsta sinn sem hann tekur upp tónlistarmyndband.

Í sjálfu myndbandinu eru dansandi krakkar sem munstraða kassa á hausnum í stóru hlutverki. „Við vöktum mikla athygli hvert sem við fórum að taka upp enda ekki vanalegt að sjá dansandi fólk með kassa á hausnum víðs vegar um borgin. Þetta var mjög gaman," segir Ísak að lokum. -áp

Myndbandið má sjá hér.