Frakkar sleppa morðingja

Frakkar hafa sleppt úr fangelsi Írana sem myrti Shahpour Bakhtiar fyrrverandi forsætisráðherra Írans árið 1991.

Ali Vakili Rad myrti hinn 76 ára gamla Bakhtiar á heimili hans í París. Hann var dæmdur í lífstíðarfangelsi fyrir morðið árið 1994.

Bakthiar var síðasti forsætisráðherra Írans meðan það var ennþá undir keisarastjórn. Morðingi hans er hetja í heimalandi sínu þar sem litið var á Bakhtiar sem andbyltingarsinna.

Vakili Rad er annar Íraninn sem Frakkar sleppa úr fangelsi á innan við tveim vikum.

Það hefur leitt til vangaveltna um að þeim hafi verið sleppt í skiptum fyrir unga franska konu sem nýlega var sleppt úr fangelsi í Íran. Hún hafði verið dæmd í tíu ára fangelsi fyrir njósnir.