Senda reikninga og samþykkja þá líka

Tveir forsvarsmenn slitastjórna Spron og Frjálsa fjárfestingabankans senda lögfræðiverkefni tengdum Spron og Frjálsa sem þau ná ekki að sinna sjálf til félags í þeirra eigu og þrotabúin, sem þeir stýra, greiða fyrir.

Við sögðum frá því í gær að Hlynur Jónsson, formaður slitastjórna Spron og Frjálsa fjárfestingabankans væri jafnframt stjórnarformaður stærsta kröfuhafa Frjálsa.

Hlynur Jónsson var um tíma yfirlögfræðingur Fjármálaeftirlitsins og er nú meðeigandi á lögfræðistofunni Kvasir lögmenn. Annar meðeigandi hjá Kvasir lögmönnum er Hildur Sólveig Pétursdóttir, en hún situr í slitastjórn Spron og Frjálsa ásamt Hlyni.

Þau Hildur og Hlynur stofnuðu félag sem heitir Nýsúla í september 2009. Þar starfa þrír lögmenn, á þeirra ábyrgð. Félagið Nýsúla er til húsa hjá Kvasir lögmönnum.

Starfsmenn Nýsúlu sinna ýmsum lögfræðilegum verkefnum fyrir þrotabú Spron og Frjálsa fjárfestingabankans, gegn útseldu tímagjaldi - en algengt tímagjald fyrir slík störf er á bilinu átján til tuttugu og tvö þúsund krónur. Reikningurinn fyrir þá þjónustu er síðan sendur þrotabúunum og samþykktur af Hlyni Jónssyni, formanni slitastjórnanna beggja og eiganda félagsins sem sendir reikninginn.