Morðingja enn leitað á Englandi

Vopnaðir lögreglumenn í Bretlandi leita enn að manni sem um helgina skaut fyrrverandi kærustu sína, myrti ástmann hennar og skaut lögregluþjón í höfuðið.

Raoul Thomas Moat, 37 ára gömlum fyrrverandi dyraverði á næturklúbbi var sleppt úr fangelsi á fimmtudaginn var og tveimur dögum síðar rann á hann æði. Samantha Stobbart, 22 ára gömul fyrrverandi kærasta Moats er á gjörgæslu eftir að hann skaut hana nokkrum skotum. Kærasti hennar, Karatekennarinn Chris Brown beið bana í árásinni þegar Moat skaut hann fyrir utan heimili þeirra í bænum Gateshead í norðausturhluta Bretlands.

Degi síðar skaut Moat lögregluþjóninn David Rathband af tilefnislausu þar sem hann var á eftirlitsferð í Newcaastle. Rathband fékk skot í höfuðið og í brjóstkassann en er ekki talinn í lífshættu.

Mikil leit er nú gerð að Moat og hefur lögreglan í Northumbria sýslu fengið aðstoð frá öðrum umdæmum. Almenningur er beðinn um að nálgast Moat ekki verði einhver hans var en hann er vopnaður og talinn mjög hættulegur.