Niðurlagning Varnarmálastofnunnar í uppnámi

Þingmenn Framsóknarflokksins hafa farið fram á fund með utanríkismálanefnd klukkan þrjú í dag vegna málefna Varnarmálastofnunnar. Hana á að leggja niður um áramótin en sérstök verkefnastjórn vinnur að því að leysa hana upp. Meðal annars á hún að færa verkefni stofnunarinnar í önnur ráðuneyti og ákveða örlög þeirra fimmtíu starfsmanna sem þar starfa.

„Við fengum þær upplýsingar fyrir um tíu dögum síðan að það væri algjör upplausn í verkefnastjórninni," segir Sigurður Ingi Jóhannsson, starfandi þingflokksformaður Framsóknarflokksins um óeiningu í verkefnastjórninni sem hann vill meina að stefni framtíð þeirra sem hjá stofnunni starfa í algjört uppnám.

Sigurður fullyrðir að þessi óeining innan verkefnastjórnarinnar lýsi sér þannig að ráðuneytin rífist um það hver skal fá hvað. Og um það sé harðlega deilt.

Sjálfur segir Sigurður Ingi að það sé knappur tími til stefnu ætli ríkisstjórninni að takast að leysa stofnunina upp með farsælum hætti.

Þá gagnrýnir Sigurður einnig fá svör varðandi varnarmálaöryggisstefnu Íslendinga.

„Maður þarf beinlínis að hrópa hvar öryggismálastefna Íslendinga sé, og hvar er utanríkismálastefnan?" spyr Sigurður Ingi sem þykja svörin loðin.

Hann bætir svo við að málið sé í algjörri upplausn.

Við þetta bætist hörð gagnrýni Fréttablaðsins í dag. Meðal annars skrifaði ritstjóri blaðsins, Ólafur Stephensen, harðorðan leiðara með yfirskriftinni: „Varnarlaus gegn klúðri."

Þar skrifaði Ólafur meðal annars:

„Niðurlagning Varnarmálastofnunar virðist ætla að verða hið mesta klúður. Stofnunin verður lögum samkvæmt lögð niður eftir þrjár vikur. Eins og fram kemur í fréttaskýringu hér í blaðinu í gær hefur enn ekki verið ákveðið hvaða stofnanir taka þá að sér verkefni hennar. Málið er enn statt á sama stað og síðastliðið vor, þegar frumvarp um að leggja niður stofnunina var lagt fram."

Einnig greinir Vísir frá því í dag að fyrrverandi forstjóri Varnarmálastofnunnar, Ellisif Tinna Víðisdóttir, hafi sagt í samtali við bandaríska sendiráðið, að hún efaðist um að stofnunin yrði leyst upp á ábyrgan hátt þar sem hún teldi að ákvörðunin væri einungis tekin til þess að sefa þingflokk VG.

Þetta kom fram í pósti sem Wikileaks lak út frá sendiráði Bandaríkjanna hér á landi og er dagsettur í desember 2009.