Ramos var settur í einangrun

Brasilíski lýtalæknirinn Hosmany Ramos, sem hótaði fangaverði með eggvopni þegar hann reyndi að flýja frá fangavörðum í fyrradag, var beittur agaviðurlögum vegna málsins og settur í einangrun á Litla-Hrauni. Hann þarf að sæta einangrun í tíu daga og verður síðan að öllum líkindum vistaður á öryggisgangi á Litla-Hrauni, samkvæmt upplýsingum frá Fangelsismálastofnun.

Verið var að flytja Ramos fyrir dómara þegar hann reyndi flóttann, eins og Fréttablaðið greindi frá í gær. Hann náði að losa af sér handjárnin og stökk út úr fangaflutningabílnum. Lögreglubíll á næstu grösum náði að sveigja í veg fyrir hann og lögreglumanninum í bílnum og tveimur fangaflutningamönnum tókst svo að handsama hann.

Þá hafði hann hótað öðrum fangaverðinum lífláti með því að ota að honum heimatilbúnu eggvopni, sem hann hafði leynt á sér.

Ramos var í héraðsdómi úrskurðaður í gæsluvarðhald til 19. janúar. Hann hefur kært úrskurð dómsmálaráðuneytis þess efnis að hann verði framseldur til brasilískra yfirvalda vegna glæpaverka í heimalandinu, til héraðsdóms.- jss