Hopkins: Loksins fæ ég möguleika á að hefna mín

Gömlu hnefaleikakempurnar Roy Jones Jnr og Bernard Hopkins mætast loks aftur í hringnum 3. apríl í Las Vegas í Bandaríkjunum.

Kapparnir mættust fyrst í hringnum árið 1993 í baráttunni um IBF-millivigtar beltið og þá hafði Jones Jnr betur. Hopkins reyndi ítrekað að fá tækifæri til að mæta Jones Jnr aftur og ögraði honum við hvert tilefni í fjölmiðlum en án árangurs.

Leiðir kappanna skildu svo þegar Jones Jnr færði sig upp um þyngdarflokk á meðan Hopkins réði ríkjum í millivigtar-flokkum. Það er ekki fyrr en nú, sautján árum síðar, sem að Hopkins færi tækifæri til þess að hefna.

„Ég er búinn að horfa á bardagann sem Roy vann örugglega um það bil milljón sinnum og það er kominn tími til þess að ég loki þessum kafla í lífi mínu. Loksins fæ ég möguleika á að ná fram hefnd," segir Hopkins en tvímenningarnir hafa vissulega verið í betra standi en nú en komnir á aldur.

Hinn 45 ára gamli Hopkins hefur tapað þremur af síðustu átta bardögum sínum og hinn 41 árs Jones Jnr hefur tapað fimm af síðustu tíu bardögum sínum.