Mýflugur að drepa Dani

Viðkvæmir Danir eru að verða vitlausir á verstu mýflugnaplágu sem þeir hafa upplifað í seinni tíð.

Og skilja ekkert í að kvikindin skuli vera að hakka þá í sig núna, um miðjan september. Skýringin er þó einföld. Hiti og raki.

Hitinn í sumar var einni til einni og hálfri gráðu meiri en í meðalári. Úrkoman var sömuleiðis meiri.

Thomas Pape skordýrafræðingur við Náttúrufræðisafn ríkisins segir að ástæðan fyrir því að mýið er fyrst núna á ferðinni sé sú  að það þurfi fyrst að klekjast út í þeim mörgu vötnum og vatnspyttum sem myndast hafa.

Hitinn hafi stöðugt verið yfir 10 gráður jafnvel á nóttunni. Það séu kjöraðstæður fyrir mý.

Mörgum Dönum finnst mýflugurnar vera árásargjarnari en þær hafa verið. Pape segir að það sé misskilningur. Það sé einfaldlega miklu meira af þeim.