Jöfn tækifæri barna til frístunda

Frístundakortið hefur sannað gildi sitt og er mikilvægur stuðningur við frístundastarf barna og unglinga. Þó vekur athygli að notkun þess er minni hjá tekjulægstu fjölskyldunum en hjá fjölskyldum með meðaltekjur. Á þessu kunna að vera nokkrar skýringar en ein þeirra er augljós - þau komast ekki. Það vita flestir sem eiga börn að frístundir eru sjaldnast í göngu eða strætófæri frá heimilinu og það eru ekki öll börn svo heppin að eiga foreldra sem eru í aðstöðu til að skutla þeim til og frá.

Þótt frístundastarf sé ekki hluti af lögboðinni grunnþjónustu eru flestir sammála um að það hefur mikil áhrif á félagsmótun og forvarnargildi þess er ótvírætt. Því er afar óréttlátt að þjónusta sem er að hluta greidd með útsvarstekjum skuli ekki standa öllum jafnt til boða í raun. Þessu þarf að breyta.

Ég hef ásamt hverfisráði Grafarvogs beitt mér fyrir mótun grænnar samgöngustefnu í Grafarvogi. Mikilvægur þáttur í henni er að draga úr þörfinni fyrir skutl foreldra með börn í frístundastarf en til þess mætti tvær leiðir. Í fyrsta lagi að samræma strætó og frístundastarfið svo stálpuð börn geti tekið strætó til og frá innan hverfisins. Í öðru lagi að starfa með íþróttafélaginu Fjölni að íþróttaskóla fyrir 6-8 ára börn í öllum skólum hverfisins. Sama á við um annað frístundastarf sem hægt væri að koma fyrir í grunnskólunum en þar er samstarf skólahljómsveitar Grafarvogs og grunnskóla gott fordæmi.

Nú þegar bæði borg og borgarbúar hafa minna á milli handanna er um að gera að finna leiðir til að hagræða án þess að það komi niður á lífsgæðum okkar. Með því að draga úr þörf fyrir skutlið má ná fram mikilli hagræðingu og jafna tækifæri reykvískra barna til að stunda frístundir.

Dofri Hermannsson, varaborgarfulltrúi.

Höfundur býður sig fram í 2.-3. sæti á lista Samfylkingar fyrir borgarstjórnarkosningar.