Tuttugu ára afmælishátíð

Útvarpsþátturinn Party Zone heldur upp á tuttugu ára afmælið sitt á Nasa 4. september með mikilli hátíð. Fjölmargir troða upp, þar á meðal Gus Gus.

Útvarpsþátturinn Party Zone heldur tuttugu ára afmælishátíð á Nasa laugardagskvöldið 4. september. Á meðal þeirra sem troða upp verða Gus Gus, Human Woman, Casanova, Rythmdoctor og félagarnir Margeir og Árni E.

„Það er mjög fyndið að við sem höfum haldið að við værum ungi hlutinn af tónlistarsenunni séum núna orðnir tuttugu ára,“ segir Helgi Már, annar af stjórnendum Party Zone. „Við þurftum í upphafi að berjast fyrir tilvist þessarar senu en hún er núna komin til að vera,“ segir hann og bætir við um afmælishátíðina: „Það verður mjög gaman að fá þessa listamenn til að koma við og taka þátt.“

„Dansþáttur þjóðarinnar“, Party Zone, hóf göngu sína á framhaldsskólaútvarpstöðinni Útrás haustið 1990 undir stjórn Helga Más og Kristjáns Helga. Úr varð fjögurra tíma útvarpsþáttur á laugardagskvöldum. Fljótlega fóru að mæta í heimsókn plötusnúðar eins og Maggi Lego, Ýmir og Grétar G sem vildu ólmir fá að spila nýjustu vínyl-plöturnar sem þeir keyptu í ferðum sínum til London. Smám saman varð Party Zone ákveðin miðstöð danstónlistarsenunnar og hefur verið það allar götur síðan. Partý verður haldið á undan hátíðinni á efri hæð Nasa þar sem öllum verður boðið sem hafa komið fram í þættinum eða unnið með þeim Helga og Kristjáni í gegnum tíðina og verður gestalistinn væntanlega af lengri gerðinni.

Party Zone hefur fært Íslendingum mörg stærstu nöfn danstónlistarinnar. Nægir að nefna Masters At Work, Booka Shade, Basement Jaxx, Timo Maas, Sasha, Carl Cox, Trentemöller og Carl Craig. Ekki má gleyma öllum reifunum, Eldborg og UXA 95. Þátturinn átti góð ár á útvarpsstöðvunum Sólinni, Aðalstöðinni, X-inu, Mono og svo á Rás 2, þar sem hann er núna í loftinu.

Miðaverð á afmælishátíðina er 2.500 krónur og fer forsala fram á Midi.is. Upphitun verður fyrir hátíðina í Party Zone á Rás 2 og á síðunni Pz.is þar sem þekktir plötusnúðar munu setja inn upp­áhaldslögin sín í tilefni dagsins.

freyr@frettabladid.is