Beinn kostnaður við Kastljósið 130 milljónir

Beinn kostnaður Ríkisútvarpsins við sjónvarpsþáttinn Kastljós nemur 130 milljónum króna á ári. Þetta er á meðal þess sem fram kemur í svari menntamálaráðherra við fyrirspurn Gunnars Braga Sveinssonar þingmanns um kostnað við einstaka þætti hjá RÚV. Silfur Egils kostar 14 milljónir og Kiljan 22.

Í svarinu kemur fram að ráðherra hafi óskað eftir upplýsingum frá RÚV um þau atriði sem Gunnar Bragi spurði um en hann vildi fá að vita um kostnað við þættina Kastljós, Silfur Egils, Fréttaaukann, Kiljuna og Tíufréttir Sjónvarpsins. Í svarinu segir að heildarframleiðslukostnaður dagskrárdeildar samanstandi meðal annars af samnýtingu á starfsfólki, tækjum, húsnæði og öðrum búnaði sem þarf til framleiðslunnar.

„Það er því tæknilega erfitt að sundurliða kostnað eða sundurgreina viðbótarkostnað sem verður til við framleiðslu einstakra þátta. Fréttamenn RÚV vinna sem dæmi að framleiðslu fjölmargra frétta og fréttatengdra þátta, jafnt í útvarpi, sjónvarpi sem á vefnum, og vinna við það á vöktum alla daga ársins. Kostnaður við tíufréttir sjónvarps er tiltölulega lítill viðbótarkostnaður. Samnýting starfsfólks gildir einnig um þá sem koma að gerð annarra innlendra þátta."

Þó birtist í svarinu tafla þar sem teknar eru saman upplýsingar um beinan kostnað við gerð þáttanna sem um var spurt án ýmiss tæknikostnaðar (aðstaða og tæknibúnaður), hlutdeildar í sameiginlegum kostnaði viðkomandi deildar og hlutdeildar í sameiginlegum rekstri RÚV, svo sem húsnæðis, tækjabúnaðar, stoðdeilda og yfirstjórnar auk gjalda sem lenda á félaginu í heild.

Þá kemur í ljós að Kastljósið kostar 130 milljónir á ári, Silfur Egils kostar 14 milljónir og annar þáttur í umsjá Egils Helgasonar, Kiljan, kostar 24 milljónir. Fréttaaukinn kostar 21 milljón og tíufréttir 22 milljónir. Í lok svarsins er þess getið, að ef ákvörðun verði tekin um að hætta með einn þátt geti það haft í för með sér hækkun á einingaverði á öðrum þáttum.