Stuðningsmenn Liverpool fóru illa með United-mann (myndband)

Breska blaðið Daily Express sagði um helgina ótrúlega sögu af því hvernig tveir gramir stuðningsmenn Liverpool náðu sér hrottalega niður á stuðningsmanni Manchester United sem reitti þá til reiði.

Stuart Slann var giftur stuðningsmaður Manchester United sem hitti tvo stuðningsmenn erkifjendanna í Liverpool þegar hann var í fríi í Mexíkó. Þeir fóru að tala um knattspyrnu og þótti Liverpool-mönnum Stuart vera full ánægður með sig og gengi United.

Fór svo að mennirnir tveir, sem eru báðir bardagamenn að atvinnu, ökkla- og rifbrutu Stuart óvart þegar þeir köstuðu honum í sundlaug eftir að hann sagði þeim að United væri betra lið en Liverpool.

Einhver hefði nú haldið að tvímenningarnir hefðu látið sér segjast, en þeir voru ekki hættir.

Þeir stofnuðu Facebook-síðu í nafni stúlku sem þeir kölluðu Emmu og létu þessa Emmu hafa samband við Stuart og senda honum lokkandi skilaboð.

Svo spenntur var Stuart að hann lagði undir sig 600 kílómetra ökuferð til Skotlands til að hitta téða Emmu eftir að hún bauð honum í heimsókn.

Þegar Stuart kom loks á staðinn þar sem Emma átti að búa, var enginn þar, en hann fékk skilaboð þess efnis að hún hefði tafist í vinnunni. Hann beið í nokkra klukkutíma fyrir framan húsið þegar hann loks gafst upp og hringdi í Emmu.

Þá svaraði ekki hin huggulega Emma í símann heldur ruddalegur karlmaður með Liverpool-hreim og fljótlega áttaði Stuart sig á því að hann hefði verið gabbaður.

Liverpool-mennirnir tveir höfðu náð að gabba Stuart til að senda Emmu myndband af sér á símann þar sem hann nartar í draumaprins sem hann ætlaði að nota til að gleðja stúlkuna.

Það fylgir sögunni að kona Stuart hafi komist að Facebook-ævintýri bónda síns og hafi farið frá honum.

Þessi hrikalega fýluferð Stuart var tekin upp og hefur afraksturinn nú verið settur á netið.

Smelltu hér til að horfa á myndband sem Liverpool-mennirnir tóku saman um grínið, þar sem m.a. má hlusta á símtalið milli Stuart og "Emmu"