Fórnarlamb ofbeldisfulla sambýlismannsins stígur fram

Kona sem varð fyrir heimilisofbeldi af hálfu Bjarka Más Magnússonar, stígur fram í viðtali við DV í dag. Bjarki var fyrr í sumar dæmdur í átta ára fangelsi fyrir ítrekaðar árásir og fimmtán kynferðisbrot gegn konunni.

Hrafnhildur Stefánsdóttir sætti ofbeldi af hálfu sambýlismanns síns, Bjarka Más Magnússonar, í þrjú ár. Á þeim tíma neyddi hann hana til samræðis og annarra kynferðismaka við ellefu aðra karlmenn og tók ljósmyndir og myndbönd af kynlífsathöfnunum. Flest brotin áttu sér stað meðan þau bjuggu í Noregi, Svíþjóð og Danmörku á árunum 2005 til 2007.

Hrafnhildur stígur fram í viðtali við helgarblað DV en fyrst eftir að dómur féll í málinu lagðist hún gegn því að nafn Bjarka Más yrði birt. Ættingjar hennar og vinir hafi hinsvegar hvatt hana til að samþykkja nafnbirtingu. Í samtali við DV segist hún vilja birta nafn mannsins til verndar öðrum konum. Hún segir að sér sé stórlega létt eftir þá ákvörðun.

Bjarki er stjórnmálafræðingur að mennt. Hann útskrifaðist með BA gráðu í stjórnmálafræði frá Háskóla Íslands en stundaði meistaranám við Árósaháskólann í Danmörku. Hann hefur starfað hjá sendiskrifstofu framkvæmdastjórnar Evrópusambandsins sem og Bandalagi háskólamanna. Þá hefur Bjarki verið virkur í félagslífi og sat meðal annars í stjórn Félags ábyrgra feðra. Á þeim tíma ritaði hann greinar um börn og fjölskyldulíf sem birtar voru í fjölmiðlum.

Þegar þau Bjarki og Hrafnhildur voru búsett í Svíþjóð árið 2005 fékk hann starf sem fréttaritari Bylgjunnar og Stöðvar 2 en entist stutt í því starfi.

Hrafnhildur segir í samtali við DV að Bjarki hafi komið einstaklega vel fyrir og hrifið alla í kringum hana. Hún segir að sig hafi grunað að eitthvað væri að vegna þess hve einangruð hún var orðin. Hún hafi ekki fengið að hringja, senda tölvupósta eða fara í heimsóknir. Bjarki hafi meira að segja fylgt henni þegar hún fór til læknis, og til og frá vinnu.

Í viðtalinu ræðir Hrafnhildur um lífið án ofbeldismannsins. Hún býr nú í íbúð sem skráð er á nafn hennar og Bjarka. Hún hefur ekki heyrt í Bjarka Má eftir að dómurinn féll. Hún segist ekki vita hvar hann er búsettur.

Góður vinur Hrafnhildar býr hjá henni og styður við bakið á henni. Hún segir að í sambandinu við Bjarka Má hafi hún farið að nota áfengi og deyfilyf og hafi gert síðan. Í dag sé hún þó edrú. Hún vill koma þeim skilaboðum til kvenna sem eru í ofbeldissamböndum að það er hægt að losna.