Barnsmóðir ofbeldismannsins vildi vitna um kynóra hans

Barnsmóðir og fyrrum sambýliskona mannsins sem í gær var dæmdur í átta ára fangelsi fyrir gróft líkamlegt ofbeldi vildi vitna um kynóra mannsins en fékk ekki. Þau bjuggu saman á árunum 1991 til 1998 og eignuðust saman dóttur.

Maðurinn, sem er fæddur 1972, var dæmdur fyrir fjölmargar líkamsárásir og 15 alvarleg kynferðisbrot gagnvart fyrrverandi sambýliskonu sinni. Brotin áttu sér stað 2006 fram í ársbyrjun 2008 hér á landi og erlendis. Maðurinn var jafnframt dæmdur fyrir að hafa ráðist á föður sinn og hótað honum lífláti. Meðal annars neyddi maðurinn konuna til samræðis og annarra kynferðismaka við 11 aðra karlmenn.

Vildi kynlíf með fleirum - Hæstiréttur klofnaði

Í lögregluskýrslu sem tekin var af barnsmóður mannsins í janúar 2008 greindi hún frá því að ofbeldismaðurinn hafi viljað kynlíf með fleirum en hún hafi aldrei tekið það til greina.

Ákæruvaldið taldi nauðsynlegt að barnsmóðirin kæmi fyrir dóminn til að vitna um meintar kynferðislegar hvatir mannsins og ofbeldishneigð hans. Lögmaður mannsins fór hins vegar fram á að barnsmóðurinni yrði meinað að vitna í málinu. Ætlunin væri einungis að sverta manninn í augum dómsins með framburði hennar.

Héraðsdómur úrskurðaði 28. apríl að barnsmóðirin mætti vitna og gefa skýrslu í málinu. Þeim úrskurði áfrýjaði ofbeldismaðurinn til Hæstaréttar sem snéri úrskurðinum við, en klofnaði um leið í afstöðu sinni.

Frétti um málið í fjölmiðlum

Dóttir mannsins dvaldi reglulega á heimili hans meðan á lögreglurannsókn stóð. Fram kom í Fréttablaðinu í ágúst 2008 að móðirin hafi frétt af alvarleika brota mannsins í fjölmiðlum. Hún undraðist að lögregla hafi ekki haldið barnaverndaryfirvöldum upplýstum um gang rannsóknarinnar frá því að málið kom fyrst upp. Í framhaldinu ákvað konan að láta dóttur sína ekki framar í hendur mannsins.