Umfjöllun: Sannfærandi MR-sigur í Bláa sal

Menntaskólinn í Reykjavík sigraði Verzlunarskólann á hinum árlega kappdegi skólanna í gær. Verzlingar voru einu stigi yfir MR-ingum eftir keppni í ýmsum greinum í Hljómskálagarðinum yfir daginn. MR-ingum tókst hins vegar að snúa gæfunni sér í hag og unnu sannfærandi sigur í ræðukeppni um kvöldið. Þar með unnu MR-ingar MR-VÍ daginn 2009.

Ræðukeppnin fór fram í troðfollum Bláa sal Verzlunarskólans. Stemningin meðal stuðningsmanna ræðuliðanna var rafmögnuð, enda ætlaði allt um koll að keyra þegar liðin gengu inn í salinn. Umræðuefnið var Ísland verður betra eftir kreppuna og mæltu MR-ingar á móti fullyrðingunni en Verzlingar með.

MR-ingar hófu málflutning sinn strax í sókn og náðu að króa Verzlinga af í fyrri umferð keppninnar. Þeir héldu því fram að Verzlingar hefðu sett fram fullyrðingu sem þeir gætu með engu móti fært sönnur á. „Það er ykkar að sanna, okkar að efast,“ var viðkvæðið í ræðum MR-inga.

Þessum punkti, ásamt öðrum veigamiklum rökum MR-inga, áttu Verzlingar erfitt með að svara framan af, auk þess sem öryggi í flutningi virtist meira hjá

ræðumönnum MR-inga til að byrja með.

Í seinni umferð var hins vegar meira jafnræði með liðunum og Verzlingar komu allt aðrir til leiks. Þeir keyrðu á bjartsýni og von gagnvart framtíðinni, og höfðu þá öflugu ásökun á MR-inga að þeir væru búnir að gefast upp, meðan Verzlingar vildu áfram berjast fyrir betra Íslandi.

Þegar upp var staðið dugði það hins vegar ekki til, MR-ingar höfðu valdið málstað Verzlinga of miklum skaða í fyrri umferðinni og náðu áfram góðum stíganda í seinni umferðinni. Svo fór að oddadómarinn Jónas Margeir Ingólfsson tilkynnti um 40 stiga sigur MR, sem tæpast kom neinum á óvart.

Athygli vekur að ræðumaður kvöldsins kom úr tapliði Verzlinga, en það var Eva Fanney Ólafsdóttir, frummælandi Verzlunarskólans, sem hlaut þann titil. Samkvæmt heimildum Skólalífs er þetta í fyrsta sinn í sögu VÍ-MR dagsins sem stúlka er valin besti ræðumaðurinn, auk þess sem það er sjaldgæft að frummælendur hreppi hnossið. Var Eva afar vel að titlinum komin og skilaði pottþéttri framistöðu í báðum umferðum.

Myndir frá kappdeginum eru væntanlegar hingað inn á Skólalíf - fylgist vel með.