FH-ingar áfram með full hús - eftir stórsigur á Þrótti

Íslandsmeistarar FH er áfram með fullt hús í Lengjubikarnum í fótbolta eftir 4-0 sigur á Þrótti í Egilshöllinni í kvöld. ÍR-ingar unnu líka sinn fyrsta sigur í kvöld þegar þeir unnu Selfoss 3-2.

FH-ingar skoruðu öll mörkin sín í seinni hálfleik en þau gerðu Viktor Örn Guðmundsson, Atli Viðar Björnsson og Matthías Guðmundsson en síðasta markið var síðan sjálfsmark Þróttara.

Þetta var fyrsta tap Þróttara í Lengjubikarnum en liðið vann tvo fyrstu leiki sína á móti ÍBV (3-1) og ÍA (1-0).

FH-ingar eru með 9 stig eftir 3 leiki og eru nánast búnir að gulltryggja sig inn í átta liða úrslitin. Þeir hafa þriggja stiga forskot á ÍBV og Þrótt í 4. riðli, FH og Þróttur eiga eftir tvo leiki en ÍBV aðeins einn. Markatala FH hjálpar þeim líka en hún er 12-3.

Karl Brynjar Björnsson, Kristján Ari Halldórsson og Valur Adolf Úlfarsson komu ÍR í 3-0 á móti Selfossi en Jón Guðbrandsson náði að minnka muninn með tveimur mörkum. Þetta voru fyrstu stig ÍR-inga í 2. riðli en Selfyssingar eru enn stigalausir.