Grunur um að Teymi hafi ætlað að reka Tal í þrot

Stjórn Teymis vísar ásökunum sem leiddu til húsleitar Samkeppniseftirlitsins á skrifstofu Teymis í morgun á bug. Samkvæmt dómsúrskurði sem heimilaði húsleitina taldi Samkeppniseftirlitið grun leika á að:

1. Teymi, sem er eigandi 51% hlutar í Tali, hafi ætlað að reka fyrirtækið í þrot með ólögmætum hætti í þeim tilgangi að takmarka samkeppni á markaði.

2. Samkeppnislög hefðu verið brotin við gerð þjónustusamnings milli Vodafone og Tals árið 2008.

3. Vodafone og Tal hefðu átt með sér samráð um markaðsaðgerðir.

Í yfirlýsingu sem Þórdís Sigurðardóttir, formaður stjórnar Teymis, sendi frá sér nú fyrir stundu er því fagnað að Samkeppniseftirlitið leiti af sér allan grun um viðskiptahætti þeirra félaga sem um ræðir. Segir hún að stjórnin hvetji til þess, að rannsókninni verði hraðað og málið dragist ekki á langinn.

Lögðu aukið fé til rekstrar Tals

Þá segir Þórdís að félagið hafi lagt aukið fé til rekstrar Tals í október síðastliðinn til þess að tryggja áframhaldandi rekstur fyrirtækisins. Þær ásakanir séu því rangar að Teymi hafi viljað reka Tal í gjaldþrot af einhverjum annarlegum hvötum.

Þórdís segir að við stofnun Tals hafi verið samið um að fyrirtækið keypti þjónustu af Vodafone enda hafi Tal ekki átt eigin fjarskiptakerfi. Gildistími samnings um endursölu á GSM þjónustu sé fimm ár, enda hafi umrædd viðskipti kallað á verulegar fjárfestingar af hálfu Vodafone. Þeir sérfræðingar sem Teymi hafi leitað til fyrir undirritun samningsins hafi ótvírætt talið, að samningurinn samræmdist þeim skilyrðum sem Samkeppniseftirlitið setti samrunanum. Stjórn Teymis taki undir þá skoðun, enda hafi málið verið kannað ítarlega áður en umræddur samningur var gerður. Samkvæmt ákvörðun Samkeppniseftirlitsins sé félögunum heimilt að eiga með sér samstarf um fjarskipti og fjarskiptakerfi.

Hafnar samráði um markaðsaðgerðir

Í yfirlýsingunni hafnar Þórdís því alfarið, að Vodafone og Tal hafi átt með sér samráð um markaðsaðgerðir. Þvert á móti hafa félögin átt í harðri samkeppni eins og skoðun á markaðsaðgerðum og vöruframboði félaganna beri vitni um.

Þá harmar Þórdís það sem hún kallar ítrekaðar rangfærslur fulltrúa minnihlutaeigenda í Tali, um meintar reglubreytingar á reikiþjónustu og meinta úrskurði Póst- og fjarskiptastofnunar þar um. Ákvæðum fjarskiptalaga um reiki hafi ekki verið breytt og áðurnefndar fullyrðingar séu því rangar. Póst- og fjarskiptastofnun hafi heldur ekki tekið neina afstöðu til þess, hvort Vodafone sé heimilt að veita Tali þjónustu á reikisvæðum Símans.