Uppsagnir munu ekki hafa áhrif á þjónustu Krabbameinsfélagsins

Skipulagsbreytingar á Leitarsviði Krabbameinsfélagsins munu ekki hafa nein áhrif á þá þjónustu sem Krabbameinsfélag Íslands veitir skjólstæðingum sínum, hvorki í þéttbýli né dreifbýli. Vísir greindi frá því í gær að sex geislafræðingar á Leitarsviði myndu missa vinnuna.

„Það er ævinlega leitt þegar segja þarf upp góðu starfsfólki en meginhlutverk og markmið Leitarsviðs Krabbameinsfélagsins er að tryggja starfsemi krabbameinsleitar og sjá til þess að þjónusta verði ekki skert," segir Guðrún Agnarsdóttir, forstjóri Krabbameinsfélagsins, í yfirlýsingu sem hún sendi frá sér vegna málsins.

Guðrún segir í yfirlýsingunni að undanfarna mánuði hafi Krabbameinsfélag Íslands unnið að endurskipulagningu á Leitarsviði. Ástæða þess sé bæði takmörkun á rekstrarfé vegna almenns niðurskurðar í heilbrigðismálum og breyttar aðstæður vegna nýrrar stafrænnar tækni sem tekin var í notkun á síðasta ári. Við mat á verkferlum eftir upptöku stafrænnar tækni hafi orðið ljóst að áætluð þörf fyrir geislafræðinga til að geta boðið upp á óskerta þjónustu væri nú 5.3 til 6.0 stöðugildi í stað 7 stöðugilda áður.

Þáttur í endurskipulagningu hafi því óhjákvæmilega verið uppsögn geislafræðinga frá og með 1. júní. Í kjölfar þess hafi verið rætt við alla geislafræðinga, staðan endurmetin og flestum boðin endurráðning í skertu starfshlutfalli með fyrirvara um að tækist að manna röntgendeildina með viðunandi hætti. Í ljós hafi komið að það reyndist ekki unnt.