SS birtir afkomuviðvörun og frestar afborgunum stærri lána

Sláturfélag Suðurlands (SS) birti afkomuviðvörun nú fyrir áramótin. Í tilkynningu um málið segir að til að styrkja greiðslustöðu félagsins hafa verið nýtt ákvæði í lánasamningum til frestunar á stærri afborgunum lána fram til ársins 2010.

„Rekstrarumhverfi íslenskra fyrirtækja var afar óhagstætt á árinu 2008 vegna gengisfalls krónu, verðbólgu og hárra vaxta. Af þessum sökum verða fjármagnsliðir Sláturfélags Suðurlands afar óhagstæðir á árinu 2008 í samanburði við árið á undan sem veldur því að umtalsvert tap verður á rekstri félagsins á árinu 2008 þó endanlegar afkomutölur liggi ekki fyrir," segir í tilkynningunni.

„SS var með óverulegar stöður í framvirkum samningum, hlutabréfum og öðrum verðbréfum við fall bankanna og varð því ekki fyrir beinu tjóni vegna þess.

Velta félagsins á árinu hefur aukist talsvert og almennur rekstur gengið vel og því fyriséð að hagnaður fyrir fjármagnsliði, afskriftir og skatta verður mun hærri en árið 2007."