Fjármál frambjóðenda skoðuð aftur til 2006

Stjórnmálaflokkarnir munu á næstunni ganga frá samkomulagi sem felur í sér að þeir safni saman upplýsingum um fjármál frambjóðenda sinna aftur til ársins 2006. Samkvæmt heimildum fréttastofu felur samkomulagið jafnframt í sér að gerð verði úttekt á fjármálum flokkanna fyrir árin 2002 til 2007.

Í kjölfar umræðu skömmu fyrir þingkosningarnar í vor um styrki til Sjálfstæðisflokks, Samfylkingar og Framsóknarflokks skipaði Jóhanna Sigurðardóttir, forsætisráðherra, nefnd sem ætlað var að endurskoða lög um fjármál stjórnmálaflokkanna og frambjóðenda þeirra. Nefndinni, sem skipuð er fulltrúum allra flokka, var jafnframt falið að fjalla um hugmyndir Jóhönnu um að gerð yrði úttekt á fjármálum þeirra allt til ársins 1999.

Formennirnir funduðu í síðustu viku

Heimildir meðal nefndarmanna herma að vinnu nefndarinnar hafi miðað vel áfram og að formenn stjórnmálaflokkanna hafi hist sérstaklega í síðustu viku til að ræða málið. Skoðanir hafi þó verið skiptar um hversu langt aftur úttektin eigi að ná, en þeim aðilum sem henni er ætlað að ná til er ekki skylt að geyma bókhaldsgögn í meira en sjö ár aftur í tímann.

Gögnum skilað til Ríkisendurskoðunar

Samkvæmt samkomulaginu sem er í burðarliðnum munu flokkarnir kalla eftir upplýsingum frá frambjóðendum sínum allt aftur til sveitarstjórnarkosninganna 2006 og þingkosninganna ári síðar. Þeim gögnum sem og ársreikningum og bókhaldsgögnum flokkanna fyrir árin 2002 til 2007 munu þeir skila inn til Ríkisendurskoðunar með svipuðum hætti og er nú gert samkvæmt lögum sem tóku gildi 1. janúar 2008. Ríkisendurskoðun mun í framhaldi birta fyrir árslok útdrátt úr gögnunum með samræmdum hætti.