Erla Steina skoraði og Margrét Lára lagði upp mark

Margrét Lára Viðarsdóttir átti þátt í sínu fyrsta marki í sænsku úrvalsdeildinni þegar hún lagði upp síðasta mark Linköping í 3-0 útisigri á Hammarby.

Margrét Lára kom inn á sem varamaður eins og hún hefur gert í hinum tveimur leikjum Linköping. Að þessu sinni kom hún inn á 66. mínútu þegar staðan var orðin 2-0.

Margrét Lára átti stoðsendinguna á sænsku landsliðskonuna Caroline Seger á lokamínútu leiksins en markið skoraði Seger af vítapunktinum.

Linköping hefur unnið tvo af fyrstu þremur leikjum sínum í sænsku úrvalsdeildinni.

Djurgården, lið Guðbjargar Gunnarsdóttur og Guðrúnar Sóleyjar Gunnarsdóttur, hélt sigurgöngu sinni áfram þegar liðið vann 3-2 útisigur á Kristianstad í Íslendingaslag umferðarinnar.

Guðbjörg og Guðrún Sóley spiluðu allan leikinn eins og Erla Steina Arnardóttir og Guðný Björk Óðinsdóttir hjá Kristianstad. Hólmfríður Magnúsdóttir var einnig í byrjunarliðinu en var skipt útaf á 76. mínútu.

Erla Steina Arnardóttir skoraði fyrsta mark Kristianstad á tímabilinu eftir sendingu frá Hólmfríði Magnúsdóttur en þetta var líka fyrsta markið sem Guðbjörg Gunnarsdóttir fær á sig. Erla jafnaði þá leikinn í 1-1.

Djurgården hefur unnið alla þrjá leiki sína en Elísabet Gunnarsdóttir og lærisveinar hennar í Kristianstad eru enn án stiga.

LdB FC Malmö, lið Dóru Stefánsdóttur, vann 7-0 stórsigur á Stattena á útivelli. Dóra gat ekki leikið vegna meiðsla.

Eftir fyrstu þrjár umferðirnar eru Djurgården og Kopparbergs/ Göteborg efst með fullt hús en Djurgården er með betri markatölu. LdB FC Malmö, Linköping og Umeå IK eru síðan öll með sex stig. Kristianstad er eina liðið sem hefur fengið stig.