Afdrifarík mistök Seðlabankans

Gylfi Magnússon, efnahags- og viðskiptaráðherra, segir að Seðlabankinn hafi gert afdrifarík mistök þegar bankinn ákvað hvaða veða var krafist fyrir lánum til fjármálastofnana á síðasta ári. Afleiðingin hafi verið stærsta einstaka áfallið sem þjóðarbúið varð fyrir við bankahrunið.

Björn Valur Gíslason, þingmaður Vinstri grænna, spurði viðskiptaráðherra á Alþingi í morgun hvort ekki sé ástæða til að rannsaka sérstaklega lánveitingar Seðlabanka Íslands til viðskiptabankanna í aðdraganda hrunsins. Vísaði Björn sérstaklega til skýrslu ríkisendurskoðunar þar sem lánveitingarnar eru gagnrýndar harðlega.

Seðlabanki Íslands tapaði 270 milljörðum króna vegna lánveitinganna sem er stærsta einstaka áfallið sem ríkissjóður varð fyrir vegna bankahrunsins að sögn ráðherra. Hann útilokar ekki að málið verði rannsakað sérstaklega. Hann telur þó eðlilegt að bíða eftir skýrslu rannsóknarnefndar Alþingis.

Í nýrri skýrslu Ríkisendurskoðunar kemur fram gagnrýni á lánveitingar Seðlabankans til fjármálafyrirtækja á síðasta ári. Í framhaldinu sagði Sveinn Arason, ríkisendurskoðandi, í samtali við fréttastofu að meira tjón muni hljótist af tæknilegu gjaldþroti Seðlabankans en Icesave, verði heimtur Landsbankans eins og spáð er.

Þegar hafa 175 milljarðar króna verið afskrifaðir og munu lenda á íslensku þjóðinni vegna svonefndra ástarbréfa Seðlabankans í ár.