Atvinnubætur

6. nóvember 2009 06:00

Nú er tækifærið til að breyta rétt. Ekki króna til og ekkert annað að gera en finna nýjar leiðir. Þær gömlu leiddu okkur á slóðir sem gera lítið fyrir okkur.

„Góðan daginn! Við munum gera okkar besta til að útvega þér atvinnu eða aðra virkni í stað atvinnunnar sem þú misstir.“ Væri ekki frábært að fá svona viðbrögð þegar maður skráir sig á „Atvinnubótaskrifstofu Íslands“? Í dag stundum við söfnun fólks á bætur hvort sem þær eru vegna svokallaðrar örorku eða atvinnumissis. Tökum bara vel á móti þeim en gerum lítið sem ekkert til að koma þessu sama fólki í virkni sem er öllum svo mikilvæg.

Virk velferð er okkur öllum nauðsynleg. Það versta sem hægt er að gera manneskju er að gera viðkomandi óvirkan þegn í þjóðfélaginu. Það eru ótal leiðir til að gera viðkomandi óvirkan, gagnslausan eða hvað sem viðkomandi kýs að kalla ástandið. Ein mest notaða aðferðin er að setja manneskju á stofnun í stað þess að sinna henni heima hjá sér. En stofnun getur alveg verið í heimahúsi viðkomandi eins og það sem við yfirleitt köllum stofnun. Það fer eftir þjónustunni. Sé henni ekki stýrt af notandanum heldur veitt af hentugleika kerfisins þá skiptir engu hvar maður býr, við erum stofnanavædd. Afstofnanavæðum Ísland sem allra fyrst.

Að eiga rétt á bótum felur í sér skyldur. Enginn á að geta neitað tilboði um virkni á meðan viðkomandi þiggur bætur. Hvort sem það er atvinna, námskeið eða hvað annað sem kemur viðkomandi á lappir að morgni. Það er ekki verið að hugsa um hag einstaklingsins með því að leyfa viðkomandi að liggja í volæði heima hjá sér. Virkjum mannauðinn, þar er gífurleg orka óbeisluð.

Hvernig á svo að útvega virkni fyrir fólk? 1. Fyrirtæki og stofnanir verði beðin um verkefni sem ekki yrðu unnin ef ekki fengist fólk af atvinnubótum. 2. Sérfræðingar á atvinnubótum væru fengnir til að halda námskeið fyrir aðra. 3. Góðgerðarfélög nýtt til hugmyndasmíða og fólk fengið til að vinna verkefni fyrir þau félög sem þurfa. 4. Átak í aðgengismálum um allt land. 5. Þjálfun til nýrra starfa og svo framvegis.

Efnum til hugmyndasamkeppni á meðal ungmenna í skólum landsins. Þar er á ferðinni fólkið sem erfa skal land og mun örugglega standa sig betur en við sem klúðruðum málum.

Hugsum út úr boxinu, að minnsta kosti stofnanaboxinu.

Lifið heil.

Höfundur er formaður MND-félagsins á Íslandi.