Grikkir til rannsóknar hjá FIFA

Alþjóða Knattspyrnusambandið, FIFA, hefur tekið til skoðunar atvik sem á að hafa átt sér stað í leik Ísraela og Grikkja í undankeppni HM í síðustu viku.

Ísraelsmennirnir kvörtuðu yfir því við FIFA að stuðningsmenn gríska liðsins hefðu notað lasergeisla til að trufla markvörð ísraelska liðsins í 2-1 tapi þess í Grikklandi á miðvikudaginn.

Talsmaður FIFA staðfesti í samtali við Reuters í dag að málið væri í rannsókn.

Grikkir eru í efsta sæti 2. riðils í undankeppninni með þrettán stig eftir sex leiki líkt og Svisslendingar, en Ísraelsmenn eru í fjórða sætinu með níu stig.