Nýting auðlinda er vopn gegn kreppu

Eitt það allra versta sem yfir okkur gengur um þessar mundir er atvinnuleysi. Félagslegar og efnahagslegar afleiðingar eru vel þekktar og því verður eitt brýnasta verkefni næstu stjórnvalda að finna lausnir á þessu stóra vandamáli. Til þess þarf skýra stefnu og raunhæfa aðgerðaáætlun.

Uppgangstímanum fylgdi firring. Við vorum ein ríkasta þjóð í heimi og þóttumst hafa efni á því að nýta ekki náttúruauðlindir okkar nema að litlu leyti. Þetta viðhorf á ekki við lengur. Við verðum að vera raunsæ og nýta alla þá möguleika sem við höfum til að sporna við kreppunni. Ábyrg nýting auðlinda er nauðsyn, ekki val.

Skynsamleg umræða verður að byggjast á haldgóðum rökum ekki kreddum. Sem dæmi má nefna að í umræðunni um virkjun Þjórsár, hagnýtingu jarðhita og hrefnuveiðar,er ýmsu haldið fram sem á sér ekki stoð í raunveruleikanum en verður engu síður að viðurkenndum sannleik. Því er t.a.m. haldið fram að virkjanir og hvalveiðar muni stórskaða ferðamannaiðnað á Íslandi. Tölur í Noregi sýna að varla dró úr ferðamannastraumi til landsins eftir að hvalveiðar hófust þar að nýju og nú fara í Noregi saman hvalaskoðunarferðir og hvalveiðar. Það sama sýna íslenskar tölur. Hvalveiðar verða seint uppistöðuatvinnuvegur á Íslandi, en ég tek þær sem dæmi um mál þar sem rök eru gripin á lofti án þess að fótur sé fyrir þeim.

Íslensk forysta

Ísland er í forystu um nýtingu endurnýjanlegra orkulinda og með því leggjum við okkar af mörkum til alþjóðlegrar umhverfisverndar. Eins ber að hafa í huga að Elliðaárdalur er eitt vinælusta útivistarsvæði landsins, þrátt fyrir að virkjanir séu í næsta nágrenni og Bláa lónið er tilkomið fyrir tilstuðlan jarðvarmavirkjunar. Við þurfum að meta á ábyrgan hátt hvert mál fyrir sig og taka meiri hagsmuni fram yfir minni. Orku getum við nýtt til að afla gjaldeyristekna, s.s. með rekstri netþjónabúa og frekari stóriðju sem skapar hér jafnframt mikilvæg störf.

Við verðum að gæta þess að hverfa ekki frá raunveruleikanum inn í gerviveröld þar sem fólk telur sig ekki þurfa að lifa af því sem náttúran gefur. Til þess að vinna bug á vaxandi atvinnuleysi og stöðnun hér á landi, verðum við að nýta af skynsemi og fyrirhyggju það sem okkar góða land býður upp á. Við verðum að nýta auðlindir sjávar af útsjónarsemi og nýta okkur þá möguleika sem felast í ábyrgri beislun vatnsorku og jarðvarma. Síðast en ekki síst verðum við að gera kleift að virkja það sem okkur Íslendingum er gefið hverjum og einum, en það er orkan í okkur sjálfum.

Jón Rúnar Halldórsson sækist eftir þriðja sæti í prófkjöri Sjálfstæðisflokksins í Suðvesturkjördæmi.