Ragnar og félagar steinlágu í derby-slagnum

Ragnar Sigurðsson og félagar í IFK Göteborg voru skotnir niður á jörðina í sænsku úrvalsdeildinni í kvöld. Eftir 6-0 stórsigur á Djurgården um síðustu helgi tapaði liðið 4-1 á móti BK Häcken.

Leikurinn fór fram á Rambergsvallen í Gautaborg sem er heimavöllur BK Häcken. Liðið eru nýliðar í deildinni í ár og þetta var fyrsti derby-leikur félaganna í þrjú ár.

Þetta voru fyrstu stig og fyrstu mörk BK Häcken á tímabilinu en liðið hafði tapað fyrstu tveimur leikjum sínum 2-0. BK Häcken skoraði fyrsta mark leiksins rétt fyrir hálfleik og komst síðan í 4-0 áður en IFK-menn náðu að svara.

Ragnar Sigurðsson spilaði allan tímann í vörn IFK Göteborg en Hjálmar Jónsson sat allan tímann á bekknum. IFK Göteborg er búið að skora 7 mörk í fyrstu þremur leikjunum en er engu að síður aðeins með þrjú stig.