Dæmi um að hælisleitendur setjist að í svítum bæjarins

Hælisleitendur geta sótt um bráðabirgðaleyfi hjá Útlendingastofnun til þess að vinna hér á landi. Það gefur þeim þó engin varanleg réttindi hér á landi né aðgang að þjónustu samkvæmt Hauki Guðmundssyni forstjóra Útlendingastofnunar. Þó er ekki sjálfgefið að hælisleitendur skorti fé.

„Hælisleitendur hafa ekki heimild sem slílkir að vinna hér á landi en Útlendingastofnun getur gert þeim kleift að fá bráðabirgðaatvinnuréttindi hjá Vinnumálastofnun," segir Haukur.

„Það eru þó ekki allir sem geta fengið slíkt leyfi, það eru fyrst og fremst þeir hælisleitendur sem geta gert grein fyrir sér, þetta er ekki opin heimild fyrir menn sem uppfylla ekki landgönguskilyrði og sturta pössunum sínum niður á leið til landsins, villa á sér heimildir en krefjast þó strax hælis. Það eru sérstaklega þeir hælisleitendur sem eru með skilríki sem hafa þennan möguleika. Hins vegar er ekki algengt að sótt sé um þetta leyfi."

Þrír möguleikar eru fyrir hælisleitendur sem bíða eftir niðurstöðu Útlendingastofnunar til þess að hafa í sig og á samkvæmt Hauki. „Í fyrsta lagi ef menn hafa næga peninga þá geta þeir náttúrulega sest að í svítunni á Hótel Sögu og verið þar í hægindum, til eru dæmi um slíkt," segir Haukur.

„Í öðru lagi er aðstaða fyrir hælisleitendur út í Reykjanesbæ, því við teljum okkur hafa skuldbindingu vegna flóttamannasamninga til þess að fólk hafi í sig og á. Þess vegna hefur Útlendingastofnun samið við Reykjanesbæ um þjónustu við hælisleitendur og hefur það tekist mjög vel þó það sé kostnaðarsamt. Í þriðja lagi er það svo bráðabirgðaleyfið til atvinnuréttinda." Haukur tekur fram að hælisleitendur eiga ekki rétt á félagsþjónustu sveitafélaganna.

Alvanalegt er að dóms-og kirkjumálaráðuneytið snúi við ákvörðun Útlendingastofnunar að sögn Hauks. „Ég man hins vegar ekki eftir að það hafi gerst í svokölluðum Dublinmálum. Fæstar kærur sem koma fram í þeim málum styðjast við einhverjar röksemdir þannig að mál Paul Ramses sker sig svolítið úr að því leyti."

Oftast þegar ráðuneytið snýr við ákvörðun Útlendingastofnunar er um davlarleyfi, vegabréfsáritun, búsetuleyfi og slíkt að ræða. „Markmikið með að hafa annað stjórnsýslustig er að hafa möguleikann á að málum sé snúið við. Réttarsvið útlendingamála einkennist að því að það er ungt, þar eru tíðar breytingar og meiri réttaróvissa með útfærsluatriði en á mörgum öðrum sviðum," segir Haukur.

40-50 umsóknir um hæli eru í gangi núna samkvæmt Hauki. Umsókn Paul Ramses mun að öllum líkindum taka 9-12 mánuði hjá Útlendingastofnun. „Við erum með ákveðin hala sem við eru mað reyna að vinna niður, þetta er lengri tími en við myndum vilja hafa en við erum að vinna okkur úr þessu," segir Haukur að lokum.