Ari Freyr skoraði í tapleik Sundsvall

Fótbolti var leikinn í nágrannalöndum okkar í gær og Íslendingar eins og oft áður í eldlínunni.

Í sænska boltanum vann Helsingborg 2-1 sigur á Sundsvall. Ólafur Ingi Skúlason er búinn að jafna sig eftir meiðsli og lék síðustu 20 mínúturnar. Hann fékk vítaspyrnu í leiknum en úr henni kom sigurmarkið.

Hannes Þ. Sigurðsson, Sverrir Garðarsson og Ari Freyr Skúlason voru allir í liði Sundsvall en sá síðastnefndi skoraði eina mark liðsins.

Eyjólfur Héðinsson var í byrjunarliði GAIS sem tapaði fyrir Efsborg 1-0 í gær.

Í Danmörku urðu athyglisverð úrslit þegar SönderjyskE náði jafntefli gegn FC Kaupmannahöfn 1-1. Sölvi Geir Ottesen var í byrjunarliði SönderjyskE og lék allan leikinn.

Haraldur Freyr Guðmundsson var í byrjunarliði Álasunds sem gerði 0-0 jafntefli við Molde í norska boltanum í gær.