Stjórnendur Exista ráðfærðu sig ekki við ráðherra

Stjórnendur Exista ráðfærðu sig ekki við Björgvin G. Sigurðsson viðskiptaráðherra áður en þeir ákváðu að gera yfirtökutilboð í Skipti, móðurfélag Símans. Í fréttum Ríkisútvarpsins í gær var greint frá því að viðskiptaráðherra ætli að láta kanna hvort Exista sé heimilt að greiða fyrir bréf í Skiptum með nýjum hlutabréfum í sjálfu sér.

Erlendur Hjaltason, forstjóri Exista, segir að það sé algengur viðskiptamáti að kaupa hlut í félagi og greiða fyrir með hlut í öðru félagi líkt og Exista geri í þessu tilfelli. Hann vill ekki tjá sig sérstaklega um orð ráðherrans. Hann segir þó að allt sem Exista hafi gert í þessu máli sé vel ígrundað og heimilt samkvæmt lögum. Hann ítrekar að Skipti muni fara á markað um leið og markaðsaðstæður gefi tilefni til.

Viðskiptaráðherra segist hafa heyrt í stjórnendum Exista nú um helgina og hann hyggist fara yfir málið með þeim á þriðjudag. Hann segist ekki vera búinn að fella neina dóma í þessu máli en sjái sérstaka ástæðu til að kynna sér það nánar.