Tölfræðin er eins og mínipils

Ólafur Helgi Kristjánsson, þjálfari Blika fagnaði fyrsta sigri Breiðabliks í Landsbankadeildinni í sumar og 40 ára afmæli sínu þegar liðið hans vann 2-1 sigur á KR í Vesturbænum í kvöld. Liðið hafði fyrir leikinn gert fjögur jafntefli í röð en nú komu loksins þrjú stig í hús.

„Við brutum ísinn í þessum leik en það væri gaman ef allir snillingarnir sem eru að leika sér að tölfræðinni hjá þessu liði skoðuðu það að liðið hefur bara tapað fjórum leikjum," sagði Ólafur eftir leik en á sama tíma og menn hafa einblítt á það að Blikar hafa gert 11 jafntefli í síðast 21 deildarleik sínum þá hefur liðið aðeins tapað 4 leikjum á sama tíma.

„Þetta gengur út á það að vinna, næst best er að gera jafntefli og verst er að tapa. Þetta kemur hægt og bítandi hjá okkur," sagði Ólafur sem átti 40 ára afmæli í dag.

„Þetta var góð gjöf og strákarnir áttu þetta skilið. Ég ætla samt ekki að éta kökuna alla sjálfur. Við spiluðum leikinn öðruvísi en við erum vanir að gera. Þetta var aðeins hrárra og það var aðeins meiri "metall" í þessu en oft áður. Við vorum lélegir í síðasta leik en þetta var allt annað í dag. Það er ágæt staða á liðinu og nú er bara næsti leikur þar sem við verðum að reyna að fylgja þessu eftir," sagði Ólafur.

Ólafur var greinilega orðinn pirraður á allri umræðunni um jafntefliskóngana í Smáranum. „Þetta hefur að sjálfsögðu hvílt í undirmeðvitunni hjá mönnum enda er verið að hamra á þessu daginn út og daginn inn. Það eru samt önnur lið, sem eru gerðar miklar og jafnvel meiri væntingar til en okkar, sem eru að tapa fleiri leikjum en við. Þau hafa aftur á móti unnið fleiri leiki en við þangað til í dag. Menn einblína á jafnteflin okkar," sagði Ólafur og bætti síðan við klassískri setningu um skilgreiningu sína á tölfræði.

„Tölfræðin er eins og mínipils það fer eftir því hver horfir á það hversu sutt það er," sagði Ólafur kátur í leikslok enda ekki slæmt að fá sigur á KR-velli í afmælisgjöf.