Líst vel á þjóðaratkvæðagreiðslu næsta vor

Valgerði Sverrisdóttur, varaformanni Framsóknarflokksins, hugnast vel að fram fari þjóðaratkvæðagreiðsla á næstu mánuðum um það hvort látið verði reyna á aðildarviðræður við Evrópusambandið.

Birkir Jón Jónsson, þingmaður flokksins, hyggst leggja fram þingsályktunartillögu á Alþingi um að fram fari þjóðaratkvæðagreiðsla í seinsta lagi næsta vor um aðildarviðræður. ,,Mér líst vel á þetta," sagði Valgerður aðspurð hvernig henni hugnast hugmyndin.

Miðstjórn Framsóknarflokksins samþykkti á fundi sínum í maí að flokkurinn teldi eðlilegt að viðhöfð verði tvöföld þjóðaratkvæðagreiðsla varðandi Evrópumálin óháð öðrum kosningum. Ekki var þó kveðið á um nákvæma tímasetningu í ályktun sem var samþykkt á miðstjórnarfundinum.

Birkir skrifaði nýverið grein í Fréttablaðið ásamt Sæunni Stefánsdóttur, ritara Framsóknarflokksins, og Páli Magnússyni, bæjarritara í Kópavogi, þar sem þau hvetja til þess að efnt verði í seinsta lagi í maí á næsta ári til sérstakra kosninga um það hvort hefja eigi aðildarviðræður um inngöngu. Í framhaldinu fagnaði Jón Sigurðsson, fyrrverandi formaður flokksins, því sem hann kallaði tímabært frumkvæði þremenninganna.

Valgerður sagði í samtali við Vísi ætla að kynna sér málið frekar og ræða við Birki Jón. Hún vildi að svo stöddu ekki tjá sig um framhaldið og þá hvort hún muni beita sér fyrir málinu innan þingflokksins.