Þormóður: Stillti mér upp og skellti mér

Þormóður Árni Jónsson er úr leik í júdókeppni Ólympíuleikanna eftir tap gegn Írananum Mohammad Reza Rodaki. Þormóður hefði fengið uppreisnarglímu hefði Rodaki lagt Georgíumanninn Lasha Gujejiani. Af því varð ekki því Gejejiani vann Rodaki á yuko.

Þormóður var ekki fjarri því að leggja Íranann stóra. Leiddi 1-0 þegar 48 sekúndur voru eftir af glímunni. Þá náði Íraninn góðu taki á Þormóði og skellti honum á ippon og vann fullnaðarsigur.

„Þetta var ekkert óhugnalegt fyrr en ég fór að þreytast. Þar sem ég er 20 til 30 kílóum léttari en hann verð ég að hreyfa mig. Um leið og tempóið datt niður og ég gat ekki losað þá stillti hann mér upp og skellti mér," sagði Þormóður Árni skömmu eftir glímuna en hann var ekki fjarri því að skell Rodaki um miðja glímuna.

„Flestir hefðu steinlegið við þetta bragð en þetta eru Ólympíuleikarnir og menn sterkari hér en á mörgum öðrum mótum."