Kráareigendur mótmæla áfengisgjaldinu harðlega

Félag Kráareigenda mótmælir harðlega aðförum stjórnvalda að veitingastöðum með hækkun áfengisgjalda.Með þessari hækkun eru stjórnvöld að beina viðskiptum frá veitingahúsum,

sem eru einkarekin fyrirtæki, til vínbúða, sem eru í eigu ríkisins. Þetta kemur fram í yfirlýsingu frá félaginu.

Þar segir ennfremur að með þessu sé verið að stuðla að miklum erfiðleikum í rekstri veitingahúsa, enda deginum ljósara að veitingamenn neyðist til að mæta hækkun áfengisgjalda með frekari verðhækkunum en hafa nú þegar átt sér stað í kjölfar veikingar krónunnar og hækkunum birgja.

„Með þessu eru stjórnvöld að beina neyslu áfengis í heimahús með þeim hætti að viðskiptavinir veitingastaða koma seinna í miðborgina og undir meiri áhrifum en áður sem eykur álag á lögregluna.Lögreglan mun þar með bæði þurfa að taka á auknu álagi í miðborginni auk þess að þurfa að sinna fleiri verkefnum í úthverfum."

Þá segir í yfirlýsingunni að niðurstaða nefndar um betri miðborg, sem starfrækt var á vegum Reykjavíkurborgar og í samráði við hagsmunaaðila sem hlut eiga að máli, var að veitingastaðir væru betur til þess fallnir að sinna þeim sem kjósa að njóta áfengis en einstaklingar í heimahúsum.

„Auk þess væri öryggi manna betur borgið innan veggja veitingastaðanna. Þá var ennfremur sett fram það markmið í skýrslu nefndarinnar að beina fólki fyrr niður í miðbæ, en þessu markmiði er augljóslega stefnt í hættu verði áfengi dýrara á veitingastöðum en það er nú þegar. Þessu til viðbótar má leiða líkur að því að veitingastaðir miðborgarinnar muni fá skellinn í umfjöllun fjölmiðla, verði áðurnefnd vandamál að veruleika.

Hækkun verðlags getur auk þess haft umtalsverð áhrif á umfang ferðaþjónustu hér á landi, og því viðbúið að verslun ferðamanna á veitingahúsum bæjarins dragist saman, þegar yfirvofandi verðhækkanir áfengis verða að veruleika."

Þá segir að veigingamenn hafi tekið mikinn skell á undanförnum árum og megi þar benda á að reykingarbannið hafi verið illa ígrundað og í raun illa unnið þannig að ekki hefur enn skapast um það sátt.

„Áfengisgjald á sterkt áfengi hækkaði um 15% árið 2002 og svo um 7% árið 2004, og nú bætist við þriðja hækkunin á einungis 6 árum. Vert er að geta þess að í nágrannalöndum okkar er áfengisgjald margfalt lægra en það er hér á landi, jafnvel fyrir þessa hækkun.

Með nýsamþykktri hækkun áfengisgjalda teljum við að vegið sé alvarlega að okkar starfsumhverfi og viljum benda á að í gegnum tíðina hefur veitingastarfsemi sætt einna mestum álögum frá ríki og borg af öllum stéttum landsins. "