Georgía segir skilið við samtök fyrrverandi Sovétlýðvelda

Míkhal Saakashvílí, forseti Georgíu, greindi frá því í dag að landið myndi segja sig úr samtökum sjálfstæðra ríkja sem eru samtök fyrrverandi Sovétlýðvelda.

Talið er að allt að 150 þúsund manns hafi safnast saman við þinghúsið í Tblisi, höfuðborg Georgíu, í dag þar sem Saakashvílí ávarpaði mannfjöldann. Fólk hrópaði slagorð gegn Rússslandi og sagði forsætisráðherrann Vladímír Pútín hryðjuverkamann. Saakashvílí kallaði enn fremur eftir því að alþjóðasamfélagið fordæmdi Rússa fyrir framferði sitt í Suður-Ossetíu og Georgíu.

Þótt fregnir hafi borist af því að Rússar hafi hætt hernaðaraðgerðum sínum í Georgíu virðist ástandið enn eldfimt og fregnir berast af átökum í öðru sjálfstjórnarhéraði í Georgíu, Abkasíu. Þar hefur slegið í brýnu með uppreisnarmönnum og her Georgíu.