Spá yfir tíu prósenta verðbólgu

Greiningardeild Landsbankans spáir því að verðbólga aukist verulega milli mánaða og mælist rúmlega tíu prósent í apríl. Þetta kemur fram í verðbólguspá sem birt var í gær.

Í henni er gert ráð fyrir að vísitala neysluverðs hækki um nærri tvö prósent á milli mánaða og sem leiði til þess að tólf mánaða verðbólga fari úr 8,7 prósentum í 10,1 prósent. Segir greiningardeildin að miklar verðhækkanir á innfluttum vörum leiði til hækkunar verðbólgunnar að þessu sinni.

Gangi spáin eftir verður verðbólgan í apríl sú mesta sem mælst hefur í nærri tvo áratugi en verðbólga hefur ekki farið yfir tíu prósent frá því í október árið 1990.