Inngrip stjórnvalda gæti valdið óróa í stað þess að draga úr spennu

Inngrip ríkisins hjá Glitni og þar með stærsta hluthafanum, Stoðum, gæti valdið meiri óróa á markaðnum í stað þess að draga úr spennu. Viðræður voru í gangi við Landsbankann um sameiningu við Glitni áður en ríkið greip inn í en í dag gæti Landsbankinn fengið Glitni á mun hagstæðari kjörum en fyrir helgina.

Rekstur Stoða hefur verið frystur til 20. október í samræmi við úrskurð um greiðslustöðvun og kemur því í ljós á næstu þremur vikum hvort félagið heldur velli. Aðeins tveir möguleikar eru í stöðunni: annaðhvort tekst Stoðum að semja við lánardrottna og/eða selja eignir eða það verður lýst gjaldþrota. Gríðarlegir hagsmunir eru í húfi fyrir fjölmörg félög og einstaklinga, en samkvæmt síðasta uppgjöri voru eignir Stoða metnar á 352 milljarða og skuldir 265 milljarða - eigið fé, það er að segja eignir umfram skuldir - nam 87 milljörðum.

Eignaupptaka ríkisins á Glitni var verulegt áfall fyrir félagið en eignarhlutur þess í bankanum rýrnaði um 50 milljarða. Eigið fé Stoða lækkaði sem því nemur, en skuldirnar hafa hins vegar ekkert lækkað. Fjárhagsstaða Stoða er því í miklu uppnámi.

260 milljarða skuld Stoða er samkvæmt heimildum fréttastofu mikið til við innlendar lánastofnanir og hefði gjaldþrot félagsins því gríðarleg keðjuverkandi áhrif, ekki aðeins á tengd félög, heldur eining á viðskiptabankana, Kaupþing og Landsbankann.

Í fjármálaheiminum er um það rætt að inngrip ríkisins skapi því hugsanlega meira öldurót og óróa, í stað þess að lempa spennuna á markaði. Einnig setja margir spurningamerki við tímapressuna sem sett var á Glitnismenn að ganga að tilboði ríkisins því samkvæmt heimildum fréttastofunnar ræddu Landsbankamenn við Glitnismenn um sameiningu bankanna með aðkomu ríkisvaldsins á sunnudagskvöldið á sama tíma og örlagafundurinn stóð fyrir í Seðlabankanum og að þær viðræður hafi verið langt komnar. Stjórn Stoða vill ekki tjá sig um framvinduna frekar en það sem kom fram í yfirlýsingu stjórnar í gær.