Pólverjarnir í Keilufellsmáli neituðu sök

Pólverjarnir fjórir sem ákærðir eru fyrir húsbrot og sérstaklega hættulega líkamsárás í Keilufelli þann 22. mars síðastliðinn neituðu allir sök við þingfestingu málsins í Héraðsdómir Reykjavíkur í dag.

Þrír þeirra ákærðu neituðu einnig að hafa verið á staðnum þegar árásin átti sér stað.

Sá fjórði, sem samkvæmt ákæru er talinn vera höfuðpaurinn í málinu játaði að hafa verið á staðnum en neitar engu að síður sök.

Einn hina ákærðu, Róbert Kulaga, sagði fyrir dómi að hann væri afar ósáttur við ákæruna og að hann hyggðist fara með mál sitt til mannréttindadómstólsins í Strassbourg.

Samkvæmt ákæru réðust hinir ákærðu ásamt óþekktum mönnum að sjö samlöndum sínum á heimili þeirra í Keilufelli í mars.

Í ákæru segir að þeir hafi slegið fórnarlömb sín ítrekað í höfuð og víðs vegar um líkama með hættulegum vopnum og bareflum.

Árásarmennirnir beittu meðal annars járnstöng, járnröri, hamri, sleggju, gaddakylfu, golfkylfu, hafnaboltakylfu, hnífi og öxi.

Þeir sem fyrir þessari árás urðu hlutu mjög alvarlega áverka af árásunum.

Einn þeirra hlaut meðal annars brotin augnbotn, brotin andlitsbein, handleggsbrot og rifbrot, annar hlaut beinbrot á báðum höndum. Sá þriðji hlaut skurð á höfði, opið sár á framhandlegg og yfirborðsáverka víðs vegar um líkamann. Þrír þeirra hlutu alvarlega skurði á hnakka.

Skaðabótakröfur árásarþolanna nema alls um 10 milljónum króna. Sá sem slasaðist mest í árásinni krefst þriggja og hálfrar milljóna króna í skaðabætur.