Robson safnar fé til krabbameinsrannsókna

Sir Bobby Robson er að mestu hættur afskiptum af knattspyrnu en það þýðir ekki að hinn 75 ára gamli fyrrum landsliðsþjálfari Englendinga sé aðgerðalaus.

Robson hefur staðið í stríði við krabbamein undanfarin ár og greindist nýverið með krabba í fimmta sinn. Útlitið er ekki gott að þessu sinni, en sá gamli hefur þó ekki sagt sitt síðasta.

Læknar á Freeman sjúkrahúsinu í Newcastle spurðu Robson á sínum tíma að því hvort hann þekkti fjársterka aðila til að leggja til fé í nýja deild við sjúkrahúsið.

Robson tók þessari beiðni sem áskorun og ákvað að koma á fót sjóði sem ber nafn hans. Hann stefnir að því að safna um hálfri milljón punda til að hægt verði að reisa sérstaka rannsóknardeild við Freeman sjúkrahúsið.

Robson hefur þegar fengið velyrði fyrir styrkjum frá gamla félaginu sínu Newcastle og grannar þeirra fyrir norðan, Middlesbrough og Sunderland eru sögð hafa tekið vel í það þegar Robson leitaði til þeirra.

Sterkasta dæmið um þann hug sem er í fólki í kring um átakið var þegar kona nokkur bankaði á dyrnar hjá Robson á annan í páskum og rétti honum umslag með tæplega 275 pundum.

Hún hafði nýverið misst mann sinn úr krabba og bað gesti við útförina að gefa peninga frekar en blóm og lét þá alla renna í Robson-sjóðinn.

Robson er ekki mikið fyrir að trana sér fram og þess síður að sníkja peninga, en hann segir tilefnið gott og því sé hann til í að halda áfram.

"Þaðan sem ég kem var til máltæki sem sagði að feimið barn fengi ekki neitt. Þetta er kannski ekki sérstaklega fallegt máltæki en ég held að það eigi við í þessu tilfelli. Ég kann illa við að biðja um peninga, en ef maður spyr ekki - þá fær maður líklega ekki neitt," sagði Robson í samtali við Times.