Sviðsetning á ráni, innbrot í fjóra skóla og fíkniefnabrot

Þrír piltar innan við tvítugt hafa verið dæmdir, skilorðsbundið, í fangelsi fyrir fíkniefnabrot, húsbrot, þjófnaða og fleiri brot. Ákvörðun um refsingu fjórða piltsins sem fékk dóm, var frestað.

Þremur piltanna var gefið að sök að hafa farið í heimildarleysi inn í einbýlishús í Garðabæ, dvalið þar um stund og gert sig heimakomna. Hinum fjórða var gefið að sök innbrot í tvo bíla. Úr öðrum þeirra stal hann greiðslukorti.

Piltarnir brutust síðan inn í samtals fjóra skóla, þar sem þeir stálu ýmsum tækjum. Jafnframt var ákært fyrir innbrot í íbúð í Blönduhlíð, svo og vörslur á ríflega einu grammi af amfetamíni.

Loks var einn piltanna ákærður fyrir að sviðsetja rán í Sunnubúð í Reykjavík, ásamt félaga sínum sem þá starfaði þar við afgreiðslustörf.

Sá piltanna sem þyngstan dóminn hlaut var dæmdur í átta mánaða skilorðsbundið fangelsi. Annar var dæmdur í þriggja mánaða fangelsi, og hinn þriðji í tveggja mánaða fangelsi, hvort tveggja skilorðsbundið. Yngstu piltarnir voru fimmtán og sextán ára þegar þeir brutu af sér.