Algebra og rúmfræði vefst fyrir grunnskólanemum í samræmdum prófum

Samkvæmt Sigurgrími Skúlasyni, próffræðing hjá Námsmatsstofnun, hafa 28-40 prósent nemenda undanfarin ár ekki hlotið fimm eða hærra í einkunn í samræmdum prófum í stærðfræði. Í ár var hlutfalið 28,4 prósent. Sigurgrímur segir nemendur eiga erfitt með að ná valdi á ákveðnum hlutum og nefnir algebru og rúmfræði í því samhengi. Aftur á móti gengur grunnskólanemum betur í ensku og íslensku og eru rúmlega 9-11 prósent sem ekki ná prófunum.

Í ár tókst grunnskólanemum best upp í ensku og var meðaleinkunnin 6,9. Í íslensku var einkunnin 6,7 en í stærðfræði gekk nemendum verr upp og var meðaltalseinkunnin 5,8.

Lítill munur er eftir kjördæmum þegar einkunnir eru skoðaðar fyrir íslensku og ensku. Nemendum í Suðurkjördæmi og Norðvesturkjördæmi gekk ívið verr en jafnöldrum þeirra í öðrum kjördæmum. Mestu munar á milli kjördæma í stærðfræði en í greininni eru nemendur í Suðvesturkjördæmi að meðaltali skarpastir með einkunnina 6,3 á meðan að nemendur í Suðurkjördæmi reka lestina með meðaltalið 5,0.

Grunnskólanemendur þurfa ekki að taka samræmd próf og því er valfrjálst í hversu mörgum greinum þeir þreytta prófin. Að sögn Sigurgríms hefur undanfarin ár færst í vöxt að nemar í 8. og 9. bekk taki samræmd próf. Í ár tóku til að mynda 17,5 prósent nemenda í 9. bekk samræmda prófið í ensku og 9 prósent í stærðfræði. Aðspurður segir Sigurgrímur að ,,ef til vill eru fleiri nemendur að taka prófin en hafa erindi."

Listi yfir gengi einstakra skóla verður gerður opinber af Námsmatsstofnun síðar.