Promens byggir nýja verksmiðju í Slóvakíu

Íslenska plastframleiðslufyrirtækið Promens hefur undirritað samning um byggingu og leigu á nýju, sérhönnuðu verksmiðjuhúsnæði fyrir plastverksmiðju sína í bænum Nitra í Slóvakíu.

Sú kemur í stað gamallar verksmiðju og getur orðið rúmlega tíu þúsund fermetrar. Bent er á að verksmiðjan sé á einkar góðum stað þar sem þar eru framleiddir ýmsir plasthlutir fyrir bílaiðnaðinn, en Audi, Hyundai, Opel, Skoda og Volkswagen er meðal fjölmargra bílaframleiðenda sem eru í nágrenni verksmiðju Promens.

Promens, sem er meðal annars í eigu Atorku og Landsbankans, rekur yfir 60 verksmiðjur í Evrópu, Norður-Ameríku, Asíu og Afríku þar sem framleiddar eru ýmsar umbúðir og plastvörur.