Þið munið gleyma Mourinho

Framherjinn Nicolas Anelka var ekki par hrifinn af söngvum stuðningsmanna Chelsea um helgina þegar liðið lenti 1-0 undir gegn Arsenal um helgina. Liðið náði að snúa við blaðinu og vinna 2-1, en stuðningsmennirnir sungu "þú veist ekki hvað þú ert að gera" til Avram Grant.

Það hefur ekki reynst Grant auðvelt að fara í skó Jose Mourinho sem er í guðatölu á Stamford Bridge, en Ísraelinn hefur engu að síður náð ágætum árangri.

Anelka er ekki í nokkrum vafa um að stuðningsmennirnir muni láta af söngvum sínum á næstunni.

"Fólkið sem gagnrýnir Grant er að bera hann saman við Mourinho en hann er allt annar maður. Ef við náum að gera gott úr leiktíðinni og vinna titil, mun allt þetta fólk gleyma Mourinho," sagði Anelka í samtali við Daily Mail.