Viktor Bjarki til reynslu hjá GAIS

Viktor Bjarki Arnarsson mun á næstu dögum æfa með sænska úrvalsdeildarliðinu GAIS sem hefur tvo Íslendinga þegar á mála hjá sér.

Liðið leikur æfingaleik við Bröndby í vikunni og mun Viktor Bjarki væntanlega fá tækifæri til að sýna sig í þeim leik.

Þeir Jóhann Birnir Guðmundsson og Eyjólfur Héðinsson eru þegar á mála hjá félaginu. Eyjólfur og Viktor léku saman í Fylki sumarið 2005.

Viktor var kjörinn besti leikmaður Íslandsmótsins árið 2006 og var í kjölfarið seldur frá Víkingi til Lilleström í Noregi. Hann meiddist á undirbúningstímabilinu fyrir tæpu ári síðan og náði sér ekki aftur fyrr en seint um sumarið þar sem það tók um tvo mánuði að greina meiðslin rétt.

Hann var svo í leikmannahópi liðsins undir lok tímabilsins en fékk aldrei tækifæri hjá Tom Nordlie, þjálfara liðsins.