Heildarvelta í smásölu um 274 milljarðar í fyrra

Heildarvelta í smásöluverslun í fyrra nam rúmum 274 milljörðum króna og jókst um nærri ellefu prósent frá árinu 2006. Þetta kemur fram í Árbók verslunarinnar sem Rannsóknarsetur verslunarinnar á Bifröst gefur út.

Stærstur hluti smásölunnar í fyrra, eða rúmlega þrír fjórðu af heildarveltunni, var í dagvöruverslunum en þar á eftir komu byggingavöruverslanir með um 18 prósent veltunnar. Þriðja mesta veltan var í sölu áfengis en hún nam rúmum 19 milljörðum án virðisaukaskatts.

Sala bensínstöðva nam alls rúmum 5,7 milljörðum í fyrra og velta í bílasölu var nærri 78 milljarðar króna sem er 37 prósent af allri sölu í dagvöruverslunum ársins.

Sérvöruverslunum með mat hefur vaxið fiskur um hrygg

Mikill vöxtur hefur verið í flestum tegundum verslunar frá árinu 2001 eða alls um 53 prósent. Mest veltuaukning í krónum talið hefur orðið í stórmörkuðum eða um nærri 41 milljarð króna. Þá er bent á í árbókinni að sérvöruverslunum með mat o.þ.h. hefur vaxið fiskur um hrygg á undanförnum árum. „Þar er meðal annars um að ræða sælkeraverslanir með ýmsar tegundir matvæla eins og kaffi, osta, sælgæti o.s.frv. Sömuleiðis vex velta fiskbúða ört á milli ára sem e.t.v. má rekja til þess að þær hafa smám saman verið að breytast úr verslunum sem selja hráefni í sælkeraverslanir," segir í árbókinni.

Hins vegar hefur verslunum með vefnaðarvöru fækkað á síðustu árum. „Ætla má að annað hvort hafi fólk minnkað eigin saumaskap eða þessi tegund verslunar hafi flust inn í aðra tegund verslana eins og húsgagna- og húsbúnaðaverslanir sem hafa aukist að umfangi.

Þá er athyglisvert að svokölluð póst- og fjarverslun hefur minnkað að umfangi. Þetta felur í sér að netverslun hefur dregist saman hér á landi á meðan hún hefur eflst og vaxið í nágrannalöndum okkar. Samkvæmt nýlegri rannsókn sem Rannsóknasetur verslunarinnar gerði á netverslun á Íslandi er mun algengara að landsmenn versli um netið frá erlendum verslunum en hér innanlands," segir enn fremur í Árbók verslunarinnar.