Innanlandsflug úr skorðum í dag

Veðrið setti innanlandsflug úr skorðum í dag og eitthvað tjón varð vegna foks, þó minna en óttast var.

Veðrið var verst á Vestfjörðum og á Snæfellsnesi, en í Reykjavík var það verst um klukkan fimm í morgun, þar sem vindur fór í tuttugu metra í hviðum. Hvassara var undir Hafnarfjalli þar sem vindur fór upp undir fimmtíu metra í hviðum og á Kjalarnesi þar sem hviðurnar náðu þrjátíu metra hraða á sekúndu. Þar fauk gámur sem stóð við Klébergsskóla og lenti hann á ljósastaur og vegg við sparkvöll.

Minniháttar foktjón varð sumstaðar í höfuðborginni og síðdegis fuku þakplötur og klæðningin af stálgrindarhúsi í Bláfjöllum. Tjón vegna veðurs var þó minna en óttast var.

Innanlandsflug hefur legið niðri í dag. Búið er að aflýsa flugi til Ísafjarðar og til Vestmannaeyja, en annað innanlandsflug er í athugun klukkan hálf átta. Átta til níu hundruð manns bíða eftir flugi.